Елордада жүргізушілерге жол көрсеткен жолаушы жазаға тартылуы мүмкін

Желіде Нұр-Сұлтанда жас жігіттің жол қиылысындағы көлік қозғалысын жеңілдетуге көмектескен видеосы тарады.

Оқиға Мұңайтпасов пен Сәтбаев көшелерінің қиылысында болған. Видео авторының айтуынша, бағдаршам сөніп қап, қиылыста көлік кептелісі орын алған. Жас жігіт 20 минуттай қиылысты басқарып, жүргізушілерге көмектескен.

«Жол полицейлерінің келе жатқанына 40 минут болды. Кептелісті түгел тарқатты» дейді видео авторы.

Полиция департаментінің баспасөз қызметі оқиғаның 16 қараша күні болғанын хабарлады.

«Сағат 16:25 шамасында Мұңайтпасов-Сәтбаев қиылысында апатты жағдайда электр жарығы өшіп қалғандықтан бағдаршам жұмыс істемей қалды. Оқиға орнына полиция отряды жіберілді.

Нұр-Сұлтан қаласының полиция департаменті азаматтарға мұндай әрекеттер біліктілігі жоқ жол диспетчерінің, сондай-ақ жол қозғалысына қатысушылардың өмірі мен денсаулығына қауіпті екенін ескертеді. Мұндай жағдайларда дереу полицияға немесе «102» мобильді қосымшасына хабарласыңыз» деп түсіндірді департаментте.

Осыған ұқсас жағдай Ақтау қаласында да орын алған. Бағдаршам сөніп қалып, ұзын-сонар кептеліс қалыптасқан. Жас жігіт көшеге шығып оны тарқатқан. Алайда, азаматтың игі ісі бойынша Ақтау қалалық полиция басқармасы қызметтік тергеу жүргізіп жатыр.