Елордада Жұмабек Тәшеновке ескерткіш орнатылды

Нұр-Сұлтанда қоғам және мемлекет қайраткері, Қазақ КСР Министрлер Кеңесінің төрағасы Жұмабек Тәшеновке ескерткіш орнатылды.

Бұл туралы Orda.kz Нұр-Сұлтан әкімдігінің ресми сайтына сілтеме жасап хабарлайды.

– Бүгін көрнекті мемлекет қайраткері, еліміздің гүлденуіне үлкен үлес қосқан Жұмабек Ташеневке ескерткіш ашып отырмыз. Осыған дейін Нұр-Сұлтанда ұлы тұлғамызға көше аты берілген болса, жуырда мектепке есімі қойылды. Енді міне кезек ескерткішке келіп отыр. Ағамыздың мүсіні комиссия мүшелерінің, зиялы қауым өкілдерінің, ұрпақтарының келісімімен құйылды. Дәл сондай-ақ ескерткіштің тұрған орны да мүдделі тараптардың келісімімен таңдалды.

– Бүгінгі елорда отанымыздың тек саяси ғана емес мәдени және рухани ордасы. Бүгінге дейін Нұр-Сұлтанда еліміздің танымал тұлғаларына арналған бірқатар ескерткіш ашылды. Тәуелсіздігіміздің 30 жылдығы қарсаңында пандемияға қарамастан еліміздің руханиятын көтеретін бастамалар ары қарай да жалғаса береді, - деді Нұр-Сұлтан қаласы әкімінің орынбасары Асхат Оралов.

Мемлекет қайраткері, ғалым Мырзатай Жолдасбеков еліміздің өркендеуі жолында еңбек еткен асыл азаматтарымыз аз болмағанын, солардың арасында Жұмабек Ташеневтің шоқтығы биік екенін айрықша атап өтті. Сондай-ақ, ел руханиятының дамуы жолында еңбек етіп жатқан қала әкімдігіне алғысын білдірді.