Елордада зейнеткерді ұрып-соғып, тонап кетті (ВИДЕО)

Ер адам зейнеткерден қай жерден тамақтануға болатынын сұрап, артынан оған шабуыл жасады. Тәртіп сақшылар күдіктіні ұстады, деп хабарлады Нұр-Сұлтан полиция департаментінің баспасөз қызметі.

30 жастағы ер адам Бейсеков көшесінде 78 жастағы қала тұрғынының қасына келіп, қай жерде түскі ас ішуге болатынын сұрады. Зейнеткер жолды түсіндіріп жатқанда, соққының астында қалып үлгерді.

Қарияның ақшасы, құжаттары және екі телефон салынған сөмкесін тартып алған. Қарақшы гаражда құжаттарды қарап, өзімен бірге ақша мен телефондарды алып кеткен.

Тәртіп бұзушы ұсталып, уақытша ұстау абақтысына қамалды. Ер адам бұрын қылмыстық жауапкершілікке тартылған.

Тонау бабы бойынша қылмыстық іс қозғалды. Ұсталған адамға айыппұл, мың сағатқа дейін қоғамдық жұмыстарға тарту немесе төрт жылға дейін бас бостандығынан айыру жазасы тағайындалады.