Елордада  өз бетінше құрылыс жүргізу мәселелері талқыланды

Елордада тұрғын үй  нысандарын өз бетінше салу мәселелері бойынша жұмыс тобының отырысы өтті.

Оған мемлекеттік органдардың қызметкерлері, сондай-ақ Қазақстан құрылысшылар одағының төрағасы Талғат Ерғалиев қатысты. Бұл туралы қалалық әкімдіктің ресми сайты хабарлады.

Естеріңізге сала кетейік, елордада  тұрғын үй  нысандарын өз бетінше салу мәселелері бойынша жұмыс тобы құрылған. Оның құрамына мемлекеттік органдар қызметкерлері, сондай-ақ қоғамдық ұйымдардың, соның ішінде Қазақстан құрылысшылар одағы мен Қазақстан құрылыс салушылар қауымдастығының өкілдері кірді.

 Жұмыстар 2021 жылғы қарашада Қазақстан Республикасы Үкіметінің қаулысымен бекітілген Үлестік құрылыс және кооперативтер жөніндегі Жол картасы аясында жүзеге асырылуда, ол азаматтардың үлестік қатысу тәуекелдерін барынша азайтуға бағытталған.

Жұмыс тобының қызметі рұқсат етілмеген құрылыстарды анықтауға ғана емес, рұқсат құжаттары жоқ құрылыс салушыларға да жан-жақты көмек көрсетуге бағытталған. Осылайша, мұндай құрылыс компанияларының санын қысқарту көзделуде.

Мәселен, өткен жиында Есіл ауданына рұқсат қағазы жоқ құрылыс салушылардан түсініктемелер тыңдалды. Олардың қатарында «Вестерос Констракшн» ЖШС, «ТитанСтрой KZ», «Комфорт Тельман» ЖШС, «Саяхат Жайық» ЖШС, «Астана халықаралық университеті» ЖШС, «Сенсата девелопмент», «Айз құрылыс» ЖШС бар.

Тізімде көрсетілген ұйымдардың барлығына заңсыз кәсіпкерлік қызметі үшін жауапкершілік туралы хабарлама берілді. Қазірдің өзінде құрылыстары сатылып жатқан компанияларға құжаттар алынғанша барлық сату туралы хабарландыруларды тоқтату  талап етілді.

Сондай-ақ рұқсат құжаттары жоқ құрылыс салушыларға жан-жақты көмек көрсету мақсатында мемлекеттік органдармен бірлесіп нақты іс-шаралар жоспарын жасау ұсынылады.