Елордадағы митинг: экологиялық белсенділер жаһандық жылынуға алаңдауда

Нұр-Сұлтанда климаттың өзгеруіне қарсы  билікпен келісілген митинг өтті.

Ұйымдастырушылар 60-100-дей адам келеді деп күткенімен, 20-30-ға жуық адам келді. Шараға қатысушылар мұны орналасқан жердің шалғайлығымен (Пушкин көшесі мен Құдайбердіұлы даңғылының қиылысындағы алаң) және ыстық ауа райымен байланыстырады.

— Митинг қазақстандықтардың назарын жаһандық проблемаға – климаттық дағдарысқа, шөлейттенуге, аштыққа, жануарлар мен адамдардың жойылуына, қоныс аударуға, су тасқынына әкелетін жалпы планетаның температурасының артуына аудару мақсатында ұйымдастырылып отыр. Біздің үкімет бұл фактіні жоққа шығармайды, 2050-2060 жылдарға дейінгі іс-шаралар жоспарын белгіледі, бірақ бұл өте ұзақ уақыт. Біз бұл мәселені өткір және жиі  айтуымыз керек, - деді митинг ұйымдастырушысы, эко белсенді Екатерина.

2020 жылы Қазақстан аумағында орташа температураның жоғарылауы +1,92°С құрады және биылғы жыл 1941 жылдан бері бақылаулар тарихындағы ең жылынған кезең  болды.

 «Бұл бәрімізге парниктік газдар шығарындыларын азайтпасақ, планетаның температурасы мен экстремалды ауа райы құбылыстарының жойқын күшейетінін еске салады. Қазірдің өзінде елімізде экономика мен халықтың тұрмыс-тіршілігіне айтарлықтай зиян келтірген қауіпті гидрометеорологиялық құбылыстарды көріп отырмыз. Өрт, су тасқыны, құрғақшылық, аптап ыстық, аязды жаңбыр сияқты катаклизмдер жиірек, ұзаққа созылатын және жойқын болады» делінген митинг резолюциясында.

Табиғат қорғаушылар талаптары бар қаулы дайындап, елорда әкімі Алтай Көлгіновке жолдамақ. Қойылып отырған негізгі талаптар:

• барлық салаларда жаңартылатын энергия көздерінің (ЖЭК) үлесін арттыру: көмір мен мұнайды пайдалануды азайту;

• алдағы 10 жылда металл, цемент және бетонның көміртекті бейтарап өндірісіне көшу;

• 2030 жылға қарай көміртекті бейтарап ауыл шаруашылығына көшу;

• 2030 жылға қарай жаһандық орташа температураның 1,5°С-тан астам жоғарылауын болдырмауға сәйкес келетін деңгейге дейін жан басына шаққандағы азық-түлік тұтынудан парниктік газдар шығарындыларын азайту;

• 2030 жылға қарай мал өнімдерін өндіру мен тұтынуды 50%-ға қысқарту;

• ауыр өнеркәсіп секторындағы жабдықты жаңғырту және шығарындыларды азайту – «миллиардтаған теңгені жаңартып, өндірісті тоқтатқаннан гөрі өнеркәсіп алпауыттарына миллиондаған айыппұл төлеу оңай»;

• қалдықтарды басқару жүйесін жетілдіру, 2050 жылға қарай қайта өңдеуді 80%-ға дейін жеткізу;

• ғимараттардың қасбетін декоративті жарықтандырудан бас тарту;

• қалдықтарды жағу қондырғыларын салуға тыйым салу;

• парниктік газдар шығарындылары үшін мал шаруашылығы саласына қосымша салық салу жүйесін қолдану және өсімдік өнімдері мен олардың аналогтары өндірісін ынталандыру, қолдау, субсидиялау.