Елордада полицейлер бес айлық сәбиді автозакқа салып әкетті

Бүгін «Астана» концерт залының аумағында бірнеше адам ұсталды. Оның ішінде арбадағы бес айлық сәби де бар. Полицейлер оқиғаға қатысты түсініктеме берді.

Нұр-Сұлтан қалалық ІІД баспасөз қызметінің айтуынша, автобустардың біріне арбадағы бес айлық сәби мен әйелдің қауіпсіздігін қамтамасыз ету үшін отырғызылған.

Бұған дейін әлеуметтік желіде полицейлердің арбадағы сәбиді тиеп жатқан видеосын куәгерлер жариялаған болатын.

«Қауіпсіздікті қамтамасыз ету үшін полицейлер бес айлық сәби мен 30 жастағы елорда тұрғынын шағын автобуспен тұрғылықты жеріне жеткізген» деп түсіндірді Нұр-Сұлтан қаласы әкімдігінің баспасөз қызметі.

Сонымен бірге, полиция наразылық білдірушілердің бірнешеуінің (саны көрсетілмеген) мән-жайды анықтау үшін шынымен де аудандық ПД-не жеткізілгенін хабарлады.

Полицейлердің мәліметінше, 2022 жылдың 4 қаңтарында бір топ азамат «Астана» концерт залы аумағында рұқсат етілмеген митинг ұйымдастырмақ болған. Жергілікті атқарушы орган өкілдері түсіндіру жұмыстарын жүргізген.

Еске салсақ, әлеуметтік желілерде Нұр-Сұлтанда бірнеше ондаған адамның Маңғыстау облысының тұрғындарын қолдау үшін рұқсат етілмеген митингіге жиналғаны хабарланған болатын. Онда 2 қаңтардан бастап облыстың Жаңаөзен, Құрық, Ақшұқыр, Ақтау және басқа да елді мекендерінде стихиялық митингілер басталды. Оған көліктерге жанармай құю үшін сұйытылған газ құнының күрт өсуі себеп болды. Оның бағасы жанармай құю бекеттерінде 1 қаңтардан бастап литрі 120 теңгеге дейін көтерілді. Халық бағаны 50 теңгеге дейін түсіруді талап етуде.

Өңір тұрғындарының наразылығына ҚР Энергетика министрлігі енді газ бағасын сұраныс пен ұсынысқа сай нарықтың өзі қалыптастыратынын түсіндірді.

Қаңтардың 2-нен 3-іне қараған түні Қазақстан президенті Қасым-Жомарт Тоқаев Twitter-де үкіметке Жаңаөзендегі жағдайды шұғыл қарастыруды тапсырғанын жазды.

ҚР премьер-министрі Асқар Маминнің өкімімен Маңғыстау облысының әлеуметтік-экономикалық жағдайын қарау жөніндегі үкіметтік комиссия құрылды. Ол қазірдің өзінде Ақтауға келіп, жұмысқа кірісіп кетті.