Елордада Нұрсұлтан Назарбаев пен Қаныш Сәтпаевқа ескерткіш орнатылды

Елорда күні қарсаңында Нұр-Сұлтанда Президент кітапханасының жанында Тұңғыш Президент Нұрсұлтан Назарбаевтың ескерткіші ашылды. Мемлекет басшысы Қасым-Жомарт Тоқаев Елбасы ескерткішінің ашылу салтанатына қатысты.

Сондай-ақ, Қасым-Жомарт Тоқаевтың тапсырмасымен Нұр-Сұлтан қаласында белгілі ғалым Қаныш Сәтбаевқа ескерткіш орнатылды. Ескерткіштің ашылу рәсіміне Қазақстан Республикасының мемлекеттік хатшысы Қырымбек Көшербаев қатысты.

Мемлекеттік хатшы өз сөзінде Қаныш Сәтбаевтың Алаш ардақтыларымен мұраттас болғанын,  ел ісінде барлық салаға белсене араласқанын, Қазақстан ғылымының өркендеуіне елеулі үлес қосқанын атап өтті.

—  «Өз елінің қара тасын мақтан ете алмаған, өзге жердің алтынын да мақтап жарытпақ емес» деген екен Қаныш Сәтбаев. Осы ойға салсақ, халқы Қанышын қал-қадірінше ардақтап, есімін ұлықтап келеді. Ғұлама ғалымның атына бұған дейін қала, көше атауларының берілуі – соның айғағы. Кешегі Қазақ тау-кен-металлургия институтының бүгінде Қ.И.Сәтбаев атындағы Қазақ ұлттық техникалық зерттеу университеті аталуы да зор мәртебе. Бұл – ұлтының ұлы перзентіне көрсеткен құрметінің бір парасы ғана, – деді Қырымбек Көшербаев.

Жобаға  Павлодар облысының әкімдігі мен ғалымның жерлестері атсалысты.  Жобаның мүсіншісі Асқар Нартов.

Шараға премьер-министрдің орынбасары Ералы Тоғжанов, ҚР президентінің әкімшілігі басшысының бірінші орынбасары Дәурен Абаев, Білім және ғылым министрі Асхат Аймағамбетов, Экология, геология және табиғи ресурстар министрі Мағзұм Мырзағалиев, Нұр-Сұлтан қаласының әкімі Алтай Көлгінов, Павлодар облысының әкімі Әбілқайыр Сқақов, Қаныш Сәтбаев атындағы Қазақ ұлттық техникалық зерттеу университетінің ректоры Мейрам Бегентаев және басқа да қоғам өкілдері қатысты.