Елордада бірқатар көше атауы өзгертіледі

Елордада бірқатар жаңа көшелерге белгілі қайраткерлердің есімдері беріледі, көшелердің тағы бір бөлігі атауларын ауыстырады, деп хабарлайды ORDA.kz қаланың ономастикалық комиссиясына сілтеме жасап.

Алматы ауданында жобалық көшелерге Роза Бағланова, Хиуаз Доспанова, Салық Зиманов, Аманжол Бөлекбаев, Байкен Әшімова, Жұбан Молдағалиев есімі беріледі. Сондай-ақ, Қазақ радиосының 100 жылдығына арналған көше пайда болады.

Байқоңыр ауданындағы кейбір көшелерге Ырғайлы, Ақжарлы, Шоқпартас, Шиелі, Шеңгелді, Қарғалы және басқа елді мекендер атауы беріледі

Сонымен қатар, Есіл ауданындағы Ильинка тұрғын алабы мен Үркер шағын ауданын біріктіру жөніндегі ұсыныс қолдау тапты. Жаңа тұрғын үй алабы «Үркер» деп аталады.

Сарыарқа ауданында Пионер көшесі Талшын көшесі, Мостопоезд 463 — Жартас көшесі болып өзгертіледі.

Елордада Тарас Шевченко атында екі көше бар. Оның біріншісі — Медеу көшесіне дейін Катонқарағай деп аталады. Сонымен қатар, Алматы көшесі мен С409 Проектная көшесі біріктіріліп, атақты опера әншісі Ермек Серкебаевтың құрметіне аталады.