Елімізге Ресейден шошқа мен оның өнімдерін кіргізуге тыйым салынды

Ресей шошқаларынан африкалық оба табылды. Сол себептен елімізде сақтық шаралары күшейтіліп, Ресейден шошқа мен оның өнімдерін кіргізуге тыйым салынды.

СҚО ветеринария басқармасының мәліметінше, Ресейде бүгінгі таңда шошқадан африкалық оба шығып, малдар жаппай қырылған. Ауылшаруашылық министрлігінің ветеринарлық бақылау және қадағалау комитеті шошқа мен жабайы қабандарды, олардың етін, өнімдері мен жемазығына дейін шекарадан кіргізуге тыйым салды.

«Автокөліктерді өткізу ветеринарлық-санитарлық бекеттерінде ел аумағына өтетін барлық тауарлар мен автокөліктер тексеріледі. Омбы облысында шошқаның африкалық обасы пайда болған елді мекенде 24 желтоқсанға дейін карантин енгізілді. Жағдайды қадағалап отырмыз. Шектеу шаралары эпизоотиялық жағдай түзелгенше дейін алынбайды», - дейді СҚО ветеринария басқармасының басшысы Берік Әлжанов.

 Мамандардың айтуынша, шошқа обасы адамға жұқпайды. Бірақ, ауруды жұқтырған мал емделмейді. Оны өлтіруден басқа амал жоқ. Вакцина әлі табылмаған. Ауру белгілері 2-9 күн ішінде пайда болып, ауырған мал бірнеше сағаттан кейін өледі екен. Обаны жұқтырған шошқаның қызуы көтеріліп, жем жеуден қалады, терісі көгеріп, өкпесі қабынады.

Бүгінде СҚО-да 235 мың шошқа бар.