Елімізге электромобильдер жеңілдікпен жететін болды

Жыл соңына дейін елге кедендік төлемдер мен салықтардан босатылған тағы 11 558 электромобильді жеткізуге болады.

Қазақстандықтар елге жеңілдетілген негізде 3,5 мыңға жуық электромобиль әкелді, деп хабарлайды Мемлекеттік кірістер комитетінің баспасөз қызметі. 

Еуразиялық экономикалық комиссия кеңесі электромобильдерді бажсыз әкелуге рұқсат берді. 2023 жылы электромобильдерді жеңілдетілген импорттау квотасы арқылы -  15 000 электромобиль әкелуге рұқсат.

Мемлекеттік кірістер комитетінің мәліметінше, бүгінгі таңда Қазақстан аумағына жолаушылар кедендік декларациясы бойынша кедендік төлемдер мен салықтардан босатылған 3 442 электромобиль әкелінген. Яғни, 2023 жылдың соңына дейін тағы кедендік баж және әртүрлі  салықтардан босатылған 11 558 электромобиль импорттау мүмкіндігі бар. 

Еуразиялық экономикалық комиссия  ендігі жерде бажсыз әкелу мүмкіндігін 2025 жылға дейін ұзарту мәселесін қарастыруда.

Мемлекеттік кірістер комитеті электромобильдер кедендік баж салығынан босатылғанымен, ҚҚС-пен әкелудің тағы бір мүмкіндігі бар екенін атап өтті. Ол үшін ДСҰ мөлшерлемелері бойынша тауарларға декларация тапсыру қажет.