Еліміздің бірнеше өңірінде зейнет жасын төмендетуге арналған митинг өткізілді

Елімізде зейнет жасын 58 жасқа дейін төмендетуге арналған митингілер өтіп жатыр.

Қала көшелеріне жиналған әйелдер зейнет жасын төмендетуді, әйелдерге немерелерін бағуға мүмкіндік беруді, жұмыс деп жүріп денсаулықтарынан айырмауды талап етті.

Бүгін Қостанай, Шымкент, Алматы және еліміздің басқа да бірқатар қалаларының белсенділері рұқсат етілген митингіге шықты. Алматыдағы аналар  «Тұран» университетінің акт залына жиналды. Онда олар Қазақстан Республикасы Тәуелсіздігінің 30 жылдығына орай әйелдерге «рақымшылық» жариялауды және бұрынғы, яғни  58 жастағы зейнет жасын қайтаруды талап етуде.

Қозғалыстың ұйымдастырушысы Сәуле Қуанышпаева Orda.kz тілшісіне митинг Махатма Ганди саябағында жоспарланғанын айтты. Ұйымдастырушылар оған әрі кетсе 50-ден астам адам келеді деп ойлаған. Бірақ оған 100-ден астам адам келді. Ұйымдастырушының айтуынша, сол себепті  әкімдік қауіпсіздік жағдайын ойлап, жиынды университет ғимаратына көшіруді ұсынған.

Митингке шыққан аналардың бұл шараға  мұқият дайындалғандығы көрініп тұр. Белсенділер ұлттық камзол киіп, бастарына ақ орамал тағып алған.

Митингтің ашылуы осы қозғалыс үшін арнайы жазылған әнұранмен басталды:

«Министр, депутаттар, Сіздерге қалай үнімізді жеткіземіз,

Зейнет жасына дейінгі өмірімізді жұмыссыз қалай өткіземіз?!

Сіздерді де жарық дүниеге әкелген аналарың бар,

Зейнет жасын қайта есептеп, аналарды ренжітпеңіз».