Еліміздің тергеушілері қылмысты жасанды интеллект көмегімен ашады

Жасанды интеллект куәгерлердің жауаптарындағы қайшылықтарды анықтауға, құжаттар әзірлеуге және қылмыстық істерді тергеу процесін жеделдетуге көмектеседі, деп хабарлайды Orda.kz.

Қазақстан Республикасы Ішкі істер министрлігі тергеушіге арналған интерактивті көмекшінің пилоттық жобасын іске қосты. Бұл жасанды интеллект негізінде жұмыс істейтін жүйе, ол қазірдің өзінде Астана қаласының Есіл аудандық полициясында қолданыла бастады.

Жобаның мақсаты — тергеу іс-шараларын жеделдету және сотқа дейінгі өндіріс бойынша жұмыс істейтін қызметкерлердің жүктемесін азайту.

«Жаңа жүйе «Сотқа дейінгі тергеп-тексеру бірыңғай тізіліміне» (СТБТ) енгізілген және күнделікті жұмыстарды автоматтандыруға көмектеседі: сөйленген сөзді мәтінге аударады, іс фигуранттарының жауаптарын салыстырады және ондағы қайшылықтарды табады, жауап алу үшін нақтылаушы сұрақтар ұсынады әрі процессуалдық құжаттарды автоматты түрде әзірлейді»,  деп хабарлады ҚР ІІМ. 

Жасанды интеллект төрт модульден тұрады: тергеуді жоспарлау, жауаптарды өңдеу, құжаттарды дайындау және аналитика. Іс тіркелген сәттен бастап жүйе әрекет жоспарын ұсынады — кімді сұраққа алу керек, қандай сараптамалар жүргізу қажет және жаңа деректер түскен сайын оны түзетіп отырады. Құжаттарды әзірлеу кезінде тек нақты материалдарға ғана емес, сондай-ақ осындай істер бойынша сот практикасына да сүйенеді.

Жасанды интеллект қылмыстарды ашу процесін жеделдетуге, тергеушілер әрекеттерінің дәлдігін арттыруға және техникалық қателер үлесін азайтуға тиіс. Сонымен қатар қылмыстық істерді қарау уақытын қысқартуға және істер арасындағы байланыстар мен болжамды алгоритмдерді талдау арқылы алдын алу шараларын күшейтуге мүмкіндік береді.

Бұған дейін ІІМ патрульдік полиция қызметкерлерін қолмен ажырату мүмкін емес «смартжетондармен» жабдықтағаны хабарланған болатын. Бұл құрылғылар қызметкерлердің барлық әрекеттерін тіркейді, ал жасанды интеллекті бар бейнебақылау жүйесі ережебұзушылықтарды жедел анықтауға көмектеседі.