Еліміздің энергетика саласындағы инвестициялық жобалар кебейеді

Қазақстан Республикасы Премьер-Министрінің бірінші орынбасары Роман Склярдың төрағалығымен өткен Инвестицияларды тарту жөніндегі кеңес отырысында энергетика саласындағы инвестициялық жобаларды іске асыру барысы қаралды, деп хабарлады үкімет басшысының баспасөз қызметі.

Қазақстанда инвестициялық жобалардың жалпыұлттық пулы аясында қазіргі уақытта 61 ірі жобаны жүзеге асыру қарастырылған. Оның ішінде жаңартылатын энергия көздері нысандарын, жылу электр станцияларын салу, газ және су электр станцияларын іске қосу бар. 

2023 жылға арналған көрсеткіштер инвестиция тарту бойынша жақсы жолға қойылған жұмыстарды көрсететіні атап өтілді. Мемлекеттік органдарға инвесторлармен өзара іс-қимылды күшейтіп, жобаларды мерзімінде пайдалануға беруді қамтамасыз ету тапсырылды.

Өңірлерге инвестиция тарту мәселелері де көтерілді. Мәселен, 2023 жылы Жетісуда жалпы құны 52,8 млрд теңге болатын жоспардағы 47 инвестициялық жобаның барлығы іске қосылып, соның арқасында облыста 1200-ден астам жұмыс орны ашылды.

Оның ішінде ұлттық пул аясында жүзеге асырылған 10 ірі жоба бар. Сонымен бірге қуаттылығы 50 мегаватт жел электр станциясы, өнеркәсіптік аккумуляторлар шығаратын зауыт, мультимодальды көлік-логистикалық орталық және т.б. ашылған.

Инвестициялық жобаларды жүзеге асыруға қатысты мәселелер Инвестициялық штаб отырыстарында тұрақты негізде талқыланатын болады.