Еліміздің сот жүйесіне жасанды интеллект енгізіледі

Кеше Президент төрағалығымен өткен сот жүйесін жаңғырту жөніндегі кеңесте біраз мәселе қаралды.  Мемлекет басшысы  саладағы олқы тұстарды атап, тиісті тапсырмалар берді.

Соның бірі  -  еліміздің  сот жүйесіне жасанды интеллект енгізу туралы. Бұл бастама саладағы ашықтықты қамтамасыз етіп, сыбайлас-жемқорлықты азайтуы тиіс. Жаңа реформаны бүгін Президентке жаңа реформаны  Жоғарғы сот төрағасы Жақып Асанов таныстырды.

Оның айтуынша, жасанды интеллект кез келген істің ықтимал нәтижесін болжап, қандай шешім қабылдануы қажет екенін анықтап береді. Бұл судьялардың ісіне бір жағынан демеу, екінші жағынан тек әділетті шешім шығаруға сеп болады.

Қасым-Жомарт Тоқаев сот жүйесіне жаңа ақпараттық технологияларды пайдаланған жөн деді. Алайда бұл қадамға жан-жақты талдап қана  бару қажеттігін айтты.

Тағы бір жаңашылдық, енді елде кез келген соттың құзыреттілігі аумақпен шектелмейді. Яғни, белгілі бір судья қарап жатқан іс көп болса, онда ол өзге аймақтағы әріптесімен жүктемені бөлісе алады. Бұған IT-бағдарлама көмектеседі. 

Жақып Асановтың айтуынша,  бұл – жемқорлыққа жол бермейтін құрал. Қасым-Жомарт Тоқаев жиынға қатысушыларға барлық реформаның негізі адам игілігіне бағытталуы тиіс екенін ескертті. Сондықтан сот шешімдері бәріне түсінікті болуға тиіс. Мұның барлығы биылғы 1 шілдеден бастап енгізілетін әкімшілік әділет жүйесінің діңгегі болуы керек.