Еліміздегі полиция басшылары кезектен тыс аттестаттаудан өтеді

Қазақстан полициясы басшылары кезектен тыс аттестаттаудан өткізу туралы жарлық шықты, деп хабарлайды Orda.kz

Мемлекет басшысы Қасым-Жомарт Тоқаев Қазақстан полициясы басшыларын кезектен тыс аттестаттаудан өткізу туралы жарлыққа қол қойды, деп хабарлайды агенттік тілшісі.

Жарлыққа сәйкес мемлекет басшысы орталық және өңірлік аттестаттау комиссияларын құруды тапсырды.

Құжатқа сәйкес, ішкі істер органдарының басшы лауазымдарды атқаратын қызметкерлері, оның ішінде жеке қауіпсіздік қызметінің өкілдері кезектен тыс аттестаттаудан өтеді. Бұл аттестация батальондар мен роталардың, оның ішінде арнайы бөлімшелердің кейбір командирлері мен олардың орынбасарларына да қатысты.

Ішкі істер министрі төрағалық ететін орталық аттестаттау комиссиясының құрамына бас прокурордың орынбасарлары, сондай-ақ Ұлттық қауіпсіздік комитеті (ҰҚК) мен сыбайлас жемқорлыққа қарсы қызметтің төрағалары кіреді. 

Сонымен қатар, комиссияның құрамына Ішкі істер министрінің орынбасары, Ішкі істер министрлігі аппаратының бастығы, Ішкі істер министрлігі Заң департаментінің бастығы, сондай-ақ Ішкі істер министрлігінің кадр саясаты басқармасы бастығының орынбасары кіреді.