Еліміздегі көші-қон бақылауы күшейеді

Ішкі істер министрлігі көші-қон бақылауын күшейтуге бағытталған заңға жаңа түзетулер әзірлеуде, деп хабарлайды Orda.kz.

Ішкі істер министрлігінің Көші-қон қызметі комитеті еске салғандай, мамыр айында елге педофилдердің, экстремистер мен террористердің кіруіне тыйым салатын заң қабылданған болатын.

Орталық коммуникациялар қызметінде өткен брифингте Көші-қон қызметі комитетінің төрағасы Аслан Аталықов осы жөнінде мәлімдеме жасады.

«Қазір біз Қазақстанда 30 күннен астам болатын шетелдіктерді тіркеуді қайтару мәселесін талқылап жатырмыз, бұл процесті цифрлық технологиялардың көмегімен жеңілдету жоспарлануда», - деді ол. 

Сондай-ақ Ішкі істер министрлігі жалған тіркеулер үшін жазаны қатайтып, тәртіп бұзушыларды тез арада елден шығару үшін депортациялаудың жаңа механизмін енгізуді жоспарлап отыр.