Еліміздегі ХҚО-да өзіне-өзі қызмет көрсету аймақтары қайта іске қосылды

Еске салсақ, цифрлық даму министрі Бағдат Мусин өзіне-өзі қызмет көрсету аймағын жабу туралы шешімнің қате екендігін айтқан.

Бұл туралы «Азаматтарға арналған үкімет» мемлекеттік корпорациясының баспасөз қызметі хабарлады.

Хабарламада:

«ҚР-ның цифрлық даму, инновация және аэроғарыш өнеркәсібі министрі Бағдат Мусиннің тапсырмасы бойынша сервистік орталықтарда өзіне-өзі қызмет көрсету секторларының жұмысы қайта жанданды».

Бұған дейін карантиндік шаралардың енгізілуіне байланысты мегаполистер мен облыс аймақтарында ХҚО-да (Халыққа қызмет көрсету орталығында – ескерту ОРДА.) электронды мемлекеттік қызметтерді тәуелсіз алуға арналған аймақтар қызметін тоқтатқан болатын.

«Сәуір айынан бастап қазақстандықтар электрондық қызметтерді egov.kz порталында, eGovKzBot2.0 мобильді қосымшасында және Telegram ботында дербес ала бастады. Сонымен қатар, республика бойынша әкімдіктер, сауда және ойын-сауық орталықтары мен кітапханаларда 700-ден астам бұрыш ашылды. Өзіне-өзі қызмет көрсету секторларын қайтару арқылы кез-келген азамат электронды мемлекеттік қызметтерді халыққа қызмет көрсету орталықтарында дербес және кезекке тұрмай ала алады», - дейді ХҚО-ның баспасөз қызметі.

Еліміздегі 137 ХҚО-да өзіне-өзі қызмет ету аймағы қалпына келтірілді. Мемлекеттік корпорацияның 300-ден астам маманы азаматтарға кеңес берумен айналысатын болады. Бұл ретте egov.kz бұрыштары халыққа қызмет көрсету орталығы ғимараттарының сыртында жұмысын жалғастырады.