Еліміздегі 133 мың заңсыз мигрант елден өз еркімен кетті

Полиция 133 мың заңсыз мигранттың елден өз еркімен кетуіне көмектесті, деп хабарлады Polisia.kz.

Ішкі істер министрлігі ағымдағы жылдың ақпан айында «Мигрант» жедел-профилактикалық іс-шарасының екі кезеңін өткізді.

«Пандемия салдарынан мыңдаған шетелдіктер Қазақстан аумағынан шыға алмады. Ішкі істер министрлігі Көші-қон қызметі, шет елдердің өкілдіктері және Халықаралық көші-қон ұйымының көмегімен бұл адамдарға құжат дайындауға көмек көрсетілді. Жыл басынан бері полиция 133 мың заңсыз мигранттың республикадан өз еркімен кетуіне көмектесті. Паспортының мерзімі өткен 675 шетелдікке қайтару туралы куәлік берілді», - деді ішкі істер министрі Ерлан Тұрғымбаев.

Сонымен қатар, көші-қон заңнамасын қасақана бұзу фактілері анықталды. Жедел-профилактикалық іс-шаралар барысында 582 жұмыс беруші шетелдік жұмыс күшін рұқсатсыз пайдаланғаны үшін тиісті жауапкершілікке тартылды. Заңсыз көші-қонды ұйымдастыру фактілері бойынша 28 қылмыстық іс тіркелді.

Шымкент қаласында Өзбекстанның 70 азаматы мен Қытайдың 62 азаматын заңсыз жалдаған бірқатар заңды тұлғалар анықталды. Қазіргі уақытта заңсыз көші-қонды ұйымдастыру бойынша сотқа дейінгі тергеу басталды.

Алдын алу шаралары барысында іздеуде жүрген 140 қылмыскер ұсталды. Олардың ішінде 129 қазақстандық, ТМД елдерінің 10 азаматы, сондай-ақ сексуалдық сипаттағы зорлық-зомбылық пен бопсалау күдігімен халықаралық іздеуде жүрген Түркия азаматтары бар.

«Тек қазақстандықтар ғана емес, шетелдіктер де өздерін қауіпсіз сезінулері керек. Бұл полицияның басты міндеті», - деп атап өтті министр Ерлан Тұрғымбаев.

Көші-қон қызметі комитетінің мәліметтері бойынша көші-қон заңнамасын тұрақты түрде бұзушылар мен заңсыз көшіп келушілерді елден шығару туралы 969 сот шешімдері шығарылды.