Елімізде жұмыссыздық бойынша жәрдемақы бар ма?

Қазақстанда «жұмыссыздық бойынша жәрдемақы» деген ұғым жоқ, бірақ әлеуметтік төлемдер бар. Адам ресурстарын дамыту орталығының президенті Дәулет Арғандықов осы екі ұғымның айрмашылығын түсіндірді, деп хабарлайды Orda.kz.

Жұмыссыз азаматтың алатын әлеуметтік төлемдері жұмысынан айырылғанына байланысты мемлекеттік әлеуметтік сақтандыру қорынан төленеді. Көбінесе адамдар бұндай төлемдерді ала отырып, бейресми жұмыс істей алады.

«Біз әділдік туралы айтып отырмыз, яғни жүйе тәуекелдер туындаған жағдайда қорғаныс ретінде жұмыс істеуі керек, ол сол үшін де жасалған. Сондықтан бұл механизмдер бүгінде осылай құрылымдалған және бұл қалыпты тәжірибе. Бұл төлемді жұмыс істеп жүріп, жұмысынан айырылып қалғандар алады. Мәселен сіз бен біз жұмыс істеп, үлес қосып жатырмыз, ал бұл ақшаны жұмыс істемей, үлес қоспағандар алмауы керек. Өйткені ол әділетсіздік болады. Бүкіл әлемде жұмыс істеп, жарна салып жүргендер үшін осындай қорғаныс жұмыс істейді, ал оның ұзақтығы мен алатын қаржы сіздің жарналарыңыздың мөлшеріне байланысты», - деді Дәулет Арғандықов.

Әлеуметтік сақтандыру жүйесіне қатысушылар үшін Мемлекеттік әлеуметтік сақтандыру қорынан төлем қарастырылған. Яғни, жұмыс беруші жұмыс істейтін азаматтар үшін әлеуметтік сақтандыру қорына аударым жасаған. Содан кейін жоғалған табыстың 40% дейін осы ақшадан төленеді. Бірақ тек алты айға дейін. Ал табысы төменгі күнкөріс деңгейінен аз азаматтарға АӘК беріледі.