Елімізде Жеңістің 77 жылдығы тойлануда

Қазақстанда Ұлы Отан соғысындағы Жеңістің 77 жылдығы тойланып,  барлық ірі қалаларда мерекелік шаралар өтуде.

1941-1945 жылдардағы Ұлы Отан соғысында алған жарақатынан қаза тапқан жауынгерлер бейітіне соғыс ардагерлерінің, тыл еңбеккерлерінің, қоғамдық және жастар ұйымдары өкілдерінің қатысуымен гүл шоқтарын қойылды.

Мемлекет басшысы Қасым-Жомарт Тоқаев «Отан Ана» монументіне гүл шоғын қойып, Ұлы Отан соғысы жылдарында қаза болған қазақстандық жауынгерлердің рухына тағзым етті. Республикалық гвардияның оркестрі Мемлекеттік әнұранды орындады.

Елордадағы Nomad City Hall сахнасында Д.Исабековтың «Тыныштық күзетшісі» драмасы көрсетіледі.

«Жастар» сарайы мереке күндері әлеуметтік желідегі парақшаларында «Батырдың ерлігі» онлайн жобасын жүргізуде.

10 мамырда «АЛЖИР» мұражай-мемориалдық кешенінде  Жеңіс күніне арналған «Біз Жеңістің Ұрпағымыз!» дәрісі өтеді.  Елордалық цирк атаулы даталарға орай көрермендерге арнайы цирктік бағдарлама әзірледі.

Сондай-ақ, бұл күндері елорданың белсенді жастары мен еріктілер халық көп жиналатын орындарда естелік төсбелгілер таратады.

Алматыда 9 мамыр күні сағат 9.30-да 28 гвардияшы-панфиловшылар атындағы саябақта Мәңгілік алауға гүл қою рәсімі мен заманауи қазақстандық әскери техника мен қару-жарақ көрмесі өтті. Әскери дала асханасы бар Ұлы Отан соғысының ардагерлері мен тыл еңбеккерлеріне мерекелік дастархан жайылды. Сонымен қатар осы  саябақта мерекелік концерт өтеді.

Ақорда бұдан бұрын хабарлағандай, Қазақстан Президенті Қасым-Жомарт Тоқаевтың тапсырмасы бойынша 2022 жылы барлық өңірлерде соғыс ардагерлеріне кемінде бір миллион теңге көлемінде біржолғы жәрдемақы төленетін болады.

Еске салайық,  Ұлы Отан соғысына 1,4 миллионға жуық қазақстандық қатысып, оның 600-ден астамы майданда қаза тапқан. 100 мыңнан астам қазақстандық жауынгерлік ордендермен және медальдармен марапатталды, 500-ден астам адам Кеңес Одағының Батыры атағын алды. Сонымен қатар, 700 мыңнан астам қазақстандық майдангерлерді материалдық-техникалық жабдықтауға қатысып, Жеңіске қол жеткізуге елеулі үлес қосты. Мәселен, майданға арналған 10 оқтың тоғызын қазақстандықтар жасаған. Қазақстандықтар майданға 1,5 мыңнан астам вагон киім мен азық-түлік жөнелткен.