Елімізде жауапты хатшы қызметі жойылды

10 желтоқсан күні сенат "Қазақстан үкіметі туралы" конституциялық заңға өзгеріс енгізіп, «жауапты хатшы» лауазымын алып тастады.

Бұл туралы мемлекеттік қызмет істері агенттігінің төрағасы Анар Жайылғанова хабарлады. Оның айтуынша, Қасым-Жомарт Тоқаев осы заң жобасын қарастыруды 1 қыркүйекте тапсырған. Айта кетсек, отырыстағы депутаттар шешімге қарсы болмады.  

Еске салсақ, Нұрсұлтан Назарбаев 2007 жылы жауапты хатшы лауазымын енгізген болатын. Заңға сәйкес, жауапты хатшыны президент тағайындап, олар жоғарғы статусқа ие болатын. Аталған лауазым иелері президентке, премьер-министр мен министрге тікелей есеп беретін, бірақ министр өзгерген жағдайда орындарында қалатын. Олардың құқыларына атқарушы орган бөлімшелерінің басшыларын, қызметкерлерін жұмысқа алу не босату кіретін.  Жауапты хатшыға министр міндеті және дәл солай министрге жауапты хатшы міндеті берілмеген.

Президент 2020 жылдың 1 қыркүйектегі жолдауында тәртіпті өзгертіп, жауапты хатшы міндетін аппарат басшыларына жүктеу туралы тапсырма берген.

Қасым-Жомарт Тоқаев өз жолдауында:

«Бұл институтты енгізер кезде жауапты хатшылардың ауыспайтындығы министрлерді әкімшілік кадрлық жұмыстан босатып, аппараттың тұрақтылығын қамтамасыз етеді делінген еді. Бірақ бұлай болған жоқ. Министрлер мен жауапты хатшылар арасында кикілжің жиіледі. Оның кесірі жалпы іске тиеді»,- деген.

Соңғы өзгеріске сәйкес, жауапты хатшы міндеті аппарат басшыларына жүктелді. Ал оларды министр тағайындайды.