Елімізде жарық бағасы қымбаттады

Қазақстанда электр энергиясының бағасы жылына 31,7%-ға өсті. Тарифтер еліміздің бар өңірінде қымбаттады. 

Бұл туралы Energyprom.kz  хабарлады. 

Energyprom.kz сарапшыларының мәліметінше, маусым айының соңында электр энергиясының бағасы бір ай ішінде 0,2%-ға көтерілді. Бұл тұрғыда әсіресе Батыс Қазақстан облысы алда тұр. Мұнда тариф бірден 7,9%-ға өскен. Қалған өңірлерде маусым айында бағалар өзгеріссіз қалған. Жалпы алғанда, жыл бойы Қазақстан бойынша электр энергиясының бағасы қымбаттады. Тек Ұлытау облысында баға баяғы қалпында қалды. 

Баға өсуінің шарықтау шегі, әсіресе, Ақтөбе (+69,2% жыл сайын), Атырау (+68,2%), Павлодар (+48,5%), Шығыс Қазақстан (+44,5%) және Абай (+44,3%) облыстарында байқалды. Ал жарыққа баға оншалықты қатты өспеген аймақ — Маңғыстау облысы (тариф бір жылда тек 8% -ға өсті).

«Қазақстан бойынша орташа есеппен, тұрғындарға арналған электр энергиясының бағасы сағатына 100 киловатт үшін бірінші деңгейде 2,1 мың теңге, екінші деңгейде 2,8 мың теңге, үшінші деңгейде 3,5 мың теңге болды» деп хабарлады Energyprom сарапшылары.

Елімізде жалпы электр энергиясын өндіру көлемі 3,9%-ға өсті.

Электр энергиясының қымбаттауына себеп болған факторлардың бірі — басқа энергия таратушыларының санын азайту мәселесі болып тұр. Яғни, жеке компаниялардың лицензиялары сотсыз қайтарып алынғандықтан бизнестегі электр энергиясының бағасы кейбір өңірлерде екі есеге өсті. Бұл көптеген тауардың бағасының өсуіне де әкеп етеді.