Елімізде толық емес отбасыларға жылдық 2 пайызбен несиелік баспана беру  ұсынылды

Сенат депутаты Серік Шайдаров аз қамтылған толық емес отбасыларға жылдық 2 пайызбен несиелік баспана алу механизмін анықтауды ұсынды.

— Жақында ғана жылына 2% жеңілдетілген несиелік мөлшерлемемен баспана алу мүмкіндігін қарастыратын «Бақытты отбасы» бағдарламасынан  толық емес отбасылардың шығарылуына қатысты қоғамда наразылық туындады. Бұл шешім бірқатар себептерге байланысты қабылданды. Солардың бірі, Еңбек және халықты әлеуметтік қорғау министрлігінің мәліметі бойынша, 2019-2020 жылдары мемлекеттік қолдау алу мақсатында жалған ажырасудың екі есеге артуы (2019 жылы – 27,4 мың, 2020 жылы – 59,8 мың ажырасу). Бәлкім, бұл жерде шындық бар да  шығар. Дегенмен, бүгінгі таңда 148 мыңнан астам толық емес отбасы баспанаға мұқтаж, олардың 60 пайызының табысы ең төменгі күнкөріс деңгейінен төмен екенін түсінуіңіз керек. Бұл отбасылардың көпшілігі үшін жылдық 5 пайызбен несиелік баспана алу адам төзгісіз ауыртпалыққа айналады, - деді Шайдаров жұма күні Сенатта өткен үкімет сағатында.

Сенатор уәкілетті мемлекеттік органдарға бұл мәселені жан-жақты зерделеп, шын мәнінде мұқтаж толық емес отбасылар үшін жылдық 2 пайызбен несиелік баспана алу тетігін айқындау, оның ішінде халықтың осы санатын тұрғын үймен қамтамасыз ету жөніндегі қолданыстағы бағдарламаларға өзгерістер енгізу қажет деп санайды.