Елімізде тұрғын үй бағасы 30%-ға дейін қымбаттайды

Қазақстан құрылысшылар одағының басшысы Талғат Ерғалиев 2022 жылдың көктемінде тұрғын үй бағасының көтерілетіні туралы айтты.

Ерғалиевтің  ойынша қазір құрылыс компаниялары тұрғын үйлерді 2014-2015 жылдармен салыстырғанда төмен бағада  сатып жатыр екен.

— Ол уақытта үшінші немесе төртінші санаттағы тұрғын үйлер 1,5-2 мың долларға сатылса, қазір олар 750 долларға бағалануда. Бүгінде барлық компаниялар шығынға ұшырау шегінде тұр. Мәселе құрылыс компанияларында емес, құрылыстың  35-40%-ға қымбаттап кетуінде байланысты. Материалдар да 60-90%-ға көтеріліп кеткен, – деді Талғат Ерғалиев Құрылысшылар одағы отырысында.

Ерғалиев сонымен қатар құрылыстың құны небәрі 15%-ға өскенін айтты.

— Құрылыс 35-40%-ға қымбаттағанын, ал шаршы метрдің бағасы тек 15%-ға өскеніне логикалық тұрғыда қарайтын болсақ, бұл ертең бағаның өсуін күтеміз дегенді білдіреді. Коммерциялық тұрғын үй салушылар бағаны бірден көтере алмайды, олар ақырындап қосатын болады. 2022 жылдың көктеміне қарай бағаның шамамен 20-30%-ға өсуін күтеміз. Және бұл нақты бір жылдың ғана талдауы емес, бұл бүкіл құрылыс кезеңінің талдауы, – деген болжам білдірді Қазақстан құрылысшылар одағының басшысы.

ҚР Бәсекелестікті қорғау және дамыту агенттігінің басшысы Серік Жұманғарин қыркүйек айының басында құрылыс компаниялары бастапқы және қосалқы тұрғын үй бағасын төмендететінін айтқан болатын. 

Ол бағаның төмендеуі Алматы, Нұр-Сұлтан, Шымкент және Атырау қалаларында байқалады деген болатын.