Елімізде Металлург күні аталып өтілуде

Бүгін, 20 шілде күні, Қазақстанда металлургия саласы қызметкерлерінің кәсіби мерекесі — Металлург күні аталып өтуде, деп хабарлайды Orda.kz тілшісі.

Металлург күні 2003 жылы Қазақстан Президентінің Жарлығымен бекітілген. Бұл мереке жыл сайын шілде айының үшінші жексенбісінде атап өтіледі. Ол елдің өнеркәсіп секторы үшін ең маңызды мерекелердің бірі.

Қара металлургия — ауыр өнеркәсіптің негізгі салаларының бірі. Экономикасы дамыған мемлекеттер металлургия саласына айрықша мән береді. Өйткені шойын мен болат өндірісінсіз ғылыми-техникалық прогресті ілгерілету мүмкін емес. Металлургия құрылыс, машина жасау, кеме жасау, ұшақ жасау және басқа да маңызды салаларға қажетті шикізат пен жұмыс материалын береді.

Сонымен қатар, түсті металлургия — Қазақстандағы ең көне және жетекші өнеркәсіп салаларының бірі. Бұл саланың дамуы пайдалы қазбалардың мол ресурстарына негізделген және елдің бүкіл өнеркәсіп кешенінің қалыптасуына зор ықпал етеді.

Қазақстанның түсті металлургиясының басты артықшылығы — өзіне тиесілі минералдық-шикізат базасының болуы. Елде түсті металл кендерінің мол қоры бар. Түсті металдар тобына мыс, мырыш, қалайы, қорғасын, мышьяк, сынап кен орындары кіреді.

Сонымен қатар, қымбат металдарды (күміс, алтын және басқа да металдар — осмий, палладий, иридий, родий) өндіру және оларды қайта өңдеу Қазақстанның алтын-валюта қорын толықтырудың негізгі көздерінің елеулісі. Бұл қымбат металл әлемде ең жоғары бағаланатын өнімдердің бірі, сондықтан оның өндірісіне еліміз барынша күш салуда.

1957 жылдың 28 қыркүйегінде КСРО экономикасының қалпына келуіне ықпал еткен кеңестік металлургиялық өнеркәсіпке құрмет ретінде КСРО Жоғарғы Кеңесінің Президиумы Металлург күнін бекітті. Ол шілде айының үшінші жексенбісінде атап өтілді.

КСРО тарағаннан кейін мереке металлургия ел экономикасында сүбелі рөл ойнайтын ТМД-ның барлық елдерінде сақталып қалды.