Елімізде мектеп оқушыларына планшет беру бастамасы қолдау таппады

Қазақстандық оқушылардың оқулықтары планшетпен алмастырылмайды. 2022 жылы жарияланған жоба іске аспай қалды, деп хабарлайды Orda.kz.  

Үш жыл бұрын үкімет оқушылардың ауыр сөмке мәселесін қарап, оқулықтарды планшетке ауыстыруды жоспарлаған еді. Алайда бұл бастама өзін ақтамағаны белгілі болды. Бұл туралы мәжіліс маңайында  оқу-ағарту министрі Ғани Бейсембаев мәлімдеді.

«Оқулықтар планшетпен алмастырылмайды. Себебі тәжірибе мен сарапшылардың зерттеуі көрсеткендей, бұл әдіс әлемде өз тиімділігін дәлелдей алмады, өзін ақтамады. Сондықтан қазір көптеген елдер планшеттен бас тартып жатыр, басқа жолдарын іздеу қажет. Қазір біздің мамандар осы мәселе бойынша жұмыс істеп, жаңа стандарт пен жаңа бағдарлама енгізуге кірісті», – деді министр.

Оқушылардың иығындағы жүкті азайту үшін министрлік көптеген оқулықтарды цифрландырды, жұптық сабақтарды енгізу мен үш ауысымды оқытуды толығымен жоюды жоспарлап отыр.  

«Оқулықтар цифрландырылды. Қазір бізде цифрлық оқулықтар бар. Екіншіден, үш ауысымнан бір ауысымға көшуге ұмтылуымыз керек. Үшінші қадам – осы шаралардың арқасында мектептерде сабақ кестесін дұрыс реттеу мүмкіндігі пайда болады. Жұптық сабақтарды қою қажет, осы әдістердің барлығы түпкілікті шешім қабылдауға ықпал етеді», – деп қосты Бейсембаев.

Оның айтуынша, қазір Қазақстанда үш ауысымда оқытатын шамамен 40 мектеп бар. Ол жылдың соңына дейін мұндай мектептер толық жойылатынына уәде етті.