Елімізде  «күмәнді» көліктер тіркелмейді - ҚР ІІМ

ҚР Ішкі істер министрлігі шетелдік нөмірлері бар автокөліктерді заңдастыру барысында туындаған мәселелер бойынша қосымша түсініктемелер берді.

14 қаңтарда Астанадағы автоорталық жанына жиналған көлік әуесқойлары өзекті мәселелерді айтты. Олардың сауалдарына Астана қалалық полиция департаменті Әкімшілік полиция басқармасының бастығы Елжан Шөпеков жауап берді.

Көліктерді шетелдік тіркеуден шығару процесі көпшілікті алаңдатады. Бұл үшін көлік иелерінің Ресейге де, Қырғызстанға да, Арменияға да баруға мүмкіндігі жоқ. Ал кейбірі бұрынғы иелерін мүлде білмейді.

Полицейлер бұндай жағдайларға көмектесуге уәде берді. Тіркеуден шығару ендігі жерде шет мемлекеттердің ішкі істер органдарына ресми сұрау салулар арқылы жүзеге асырылады.

Алайда көліктің шығу тегі белгісіз, заңсыздықтарға қатысы бар болуы мүмкін «күмәнді» көліктерге бұның қатысы жоқ, ондай көлік  иелері мұндай көмекті алмайды. Бұл жағдай  «қосарланған» немесе «егіздер» деп аталып кеткен көліктер  туралы. Әртүрлі елдерде құжаттарда бірдей деректері бар екі немесе одан да көп автокөліктер бар екені белгілі болған кезде, бұл олардың шығу тегі заң бұзушылықпен байланысты деуге негіз береді.

Елжан Шөпеков мұндай көліктерді Қазақстанда тіркеу мүмкін емес екенін растады.