Елімізде елтаңба өзгерсе банкнот пен тиын ауыса ма?

ҚР Ұлттық банкі елтаңба өзгерсе, Қазақстанда банкнот пен тиындар өзгере ме деген сұраққа жауап берді, деп мәлімдейді Orda.kz ҚазАқпаратқа сілтей отырып.

ҚР Ұлттық банк басшысы Тимур Сүлейменовтің айтуынша, қазіргі айналыстағы банкноттар мен монеталар өзгертілмейді. Олар толығымен тозғанша пайдаланылады. Ол монетаның қызмет ету мерзімі кемінде 20 жыл екенін нақтылады.

«Егер елтаңбаны өзгерту  туралы шешім қабылданса, біз басып шығаратын банкноттардың дизайны басқаша болады. Біздің құрал-жабдықтарды өзгерту тұрғысынан алғанда, Ұлттық банктің теңге сарайы және банкнот фабрикасы бар, жабдықты қайта конфигурациялау техникалық тұрғыдан қиын емес, сондықтан қосымша шығын болмайды», - деді Сүлейменов. 

Еске салайық, бұған дейін Қазақстан Президенті Қасым-Жомарт Тоқаев Атырауда өткен Ұлттық Құрылтайдың үшінші отырысында сөз сөйлеп, мемлекет елтаңбасын өзгертуді ұсынған болатын.