Елімізде бір күнде тағы 152 адам коронавирустан көз жұмды

Қазақстанда коронавирустан бір күнде 152 адам, оның ішінде бір Алматының өзінде 40 кісі қайтыс болды.

 Бұл туралы 15 тамыз күні Денсаулық сақтау министрлігі хабарлады, деп жазады Orda.kz.

32 адам «ковидтектес пневмониядан» (КВИ-), 120 адам ПТР тестімен расталған коронавирустан қайтыс болды.  Алматыда 40, Шымкентте 20, Нұр-Сұлтанда 16, Маңғыстау облысында 15 кісі осы «ковидтектес пневмония» мен коронавирустан көз жұмды.

Елде кейінгі екі аптада күн сайын 8 мыңға жуық Covid науқасы тіркелуде. Мамандар мұны әлемге тез тараған «Дельта» нұсқасымен байланыстырып отыр. Алғаш рет Үндістанда тіркелген бұл нұсқа бастапқы вирусқа қарағанда тез жұғады, әрі қауіптірек саналады. Қазақстанда аурудың бұл нұсқасы маусым айының соңында тіркелді.

Індет басталғалы елде барлығы 687 мыңнан астам адамның анализінен коронавирус анықталған. Билік былтырғы  1 тамыздан бері  ПТР тесті теріс шыққан, бірақ ауру белгілері бойынша коронавирусқа ұқсайтын «ковидтектес пневмонияның» есебін жүргізіп келеді. Содан бері пневмонияның бұл түрімен 65,6 мың адам тіркелген.

19 миллион халқы бар Қазақстанда үкімет 10 миллион адамға вакцина салуды көздейді. 1 ақпаннан бері  6 миллион 74 мың адам екпе алып үлгерді.  Олардың көбі  вакцинаның бірінші  компонентін салдырған. Екпені толық алғандар саны  – 4,7 миллион адам.