Елімізде баспана бағасы қаншаға қымбаттады – статистика

Қазақстанда бір жылда жылжымайтын мүлік бағасы айтарлықтай өсті.

Ұлттық статистика бюросының мәліметінше, бір жыл ішінде – 2021 жылдың наурызынан 2022 жылдың наурызына дейін – қайталама нарықтағы пәтерлердің бағасы – 27,7 пайызға, жаңа тұрғын үй бағасы – 20,3 пайызға, жайлы пәтерлерді жалдау ақысы 22,5 пайызға өсті.

Сонымен бірге, Ұлттық статистика бюросы  атап өткендей, бір ай ішінде – ақпаннан наурызға дейін жаңа тұрғын үй бағасының ақпандағы  0,4 пайыздан наурызда 5,5 пайызға дейін өсу қарқыны байқалған.

Наурызда пәтерлерді қайта сату бағасы өткен аймен салыстырғанда 4,6 пайызға, жайлы тұрғын үйді жалға алу 3,5 пайызға өсті.

— Бюро тұрғын үй нарығындағы бағаларға ай сайын мониторинг жүргізеді. Баға индекстері облыс орталықтары мен қалалар бойынша іріктелген байқау деректері негізінде қалыптастырылады. Біз жаңа тұрғын үйлерді сату бойынша ақпаратты сатып алу операцияларын жүзеге асыратын құрылыс ұйымдарынан жинаймыз, - деп түсіндірді Ұлттық статистика бюросы баға статистикасы департаментінің директоры Қуанышбек Жақыпбекұлы.

Басқарма басшысы пәтерлерді қайта сату және жайлы тұрғын үйді жалға беру үшін интернет-ресурстар мен БАҚ-та жарияланған хабарландырулар деректері ескерілетінін түсіндірді. Ал бағаны есептеу кезінде бір, екі және үш бөлмелі пәтерлерге қатысты ұсыныстар қарастырылады.