Елімізде 7 млн-нан астам адам екпенің бірінші дозасын қабылдады

11 қыркүйектегі мәлімет бойынша Қазақстанда вакцинаның бірінші компонентін 7 044 876  адам, II компонентін 5 871 229 адам салғызды. 

ДСМ 2021 жылғы 11 қыркүйек күнгі деректер бойынша өңірлерінде КВИ-ға қарсы вакциналау жүргізу туралы ақпаратты жариялады, деп хабарлады Orda.kz.

Естеріңізде болса, аптаның басында премьер-министрдің орынбасары Ералы Тоғжановтың төрағалығымен өткен ведомствоаралық комиссия отырысында екпе салу бойынша жүргізілетін рейдтердің алгоритмі мақұлданған болатын.

Алгоритмді денсаулық сақтау министрлігі, мүдделі мемлекеттік органдар мен «Атамекен» кәсіпкерлер палатасы дайындады. Енді мониторингтік топ рейд барысында кәсіпорын қызметкерлерінің COVID-19-ға қарсы екпенің бірінші компонентін алған-алмағанын тексереді.

Қызметкерлер саны 50 адамнан асатын және вакцинаның бірінші компонентін салдырғандар саны 60%-тен төмен кәсіпорындардың тізімі жобалық кеңсенің Вакциналау картасы негізінде  енгізіледі.