Елімізде 1 шілдеден бастап шығарылатын дәрілер таңбаланады

Қазақстанда дәрілік заттарды міндетті түрде таңбалау 2024 жылдың 1 шілдесінен бастап өндірілген дәрілерге ғана енгізіледі, деп хабарлайды Orda.kz.

Бұл туралы Премьер-Министрдің орынбасары Серік Жұманғариннің төрағалығымен өткен Үкімет отырысында белгілі болды.

Енді Үкіметтің 2020 жылғы 10 қыркүйектегі қаулысына тиісті өзгерістер енгізілуде. Бұл дәріханалар мен дистрибьюторларға таңбалау кодтарын тіркеу және қадағалау үшін ақпараттық жүйелерді біріктіруді аяқтауға мүмкіндік береді.

Денсаулық сақтау вице-министрі Ербол Оспановтың айтуынша, 1 маусымдағы жағдай бойынша 383 көтерме сауда қоймасының 287-сі қажетті құрал-жабдықтармен жабдықталған. Қазірдің өзінде 15 өңірге сынақ сапарлары өтті. Қалған 5-еуі жақын арада тексеріледі.

Жалпы, ел бойынша цифрлық таңбалау енгізудің оң динамикасы байқалады: Қазақстанға аяқ киімнің ресми (анықталған) импорты 2019 жылғы 39,5 миллион жұптан 2023 жылы 54,5 миллион жұпқа дейін өсті. Кәсіпорындарға аяқ киім қорын таңбалау үшін үш жылға жуық уақыт берілді (2021 жылдың 1 қарашасынан 2024 жылдың 1 маусымына дейін).

Сонымен бірге, кеден қоймаларының аяқ киімді таңбалауды жүргізуге дайындығы жеткіліксіз болғандықтан, Өнеркәсіп және құрылыс министрлігіне импорттаушылардың жеке қоймаларында аяқ киімді таңбалауға рұқсат беру мәселесін пысықтау тапсырылды.