Елена Рыбакина әлемнің он екінші ракеткасы атанды

Бұған дейін Қазақстанның әйелдер теннисі тарихында рейтингте ешкім он екінші орынға көтерілмеген.

Қазақстандық теннисші Елена Рыбакина ресми түрде әлемнің 12-ракеткасы атанды. Бүгін, 16 қаңтарда Әйелдер теннисі қауымдастығы (WTA) кезекті рейтингін жариялады.

Бұған дейін тарихта алғаш рет WTA рейтингінің үздік 13-іне енген Қазақстанның бірінші ракеткасы 12-орынға көтерілді. Рыбакина америкалық София Кенинді  үш ұпаймен ұтып, басып озды. Бұған дейін Қазақстанның әйелдер теннисі тарихында бұл рейтингте ешкім ондай  орынға көтерілмеген.

Рейтингте 11-ші орында ресейлік Анастасия Павлюченкова (2968 ұпай), ал оныншы орында Тунис өкілі Онс Жабер (3500) иеленді.

Юлия Путинцева да бір сатыға көтеріліп, қазір 42-орынға жайғасты (1400). Ал Зарина Дияс өз орнын төрт сатыға жақсарта алды, ол қазір 104-ші (732) орында.