Елдос Ісметов Олимпиядаға жолдама ұтып алды

Алматыда дзюдодан 60 келі салмақтағы үш балуан арасында Олимпиадаға іріктеу турнирінде Елдос Ісметов жеңіске жетті.

Бұл туралы ұлттық олимпиада комитеті хабарлады.

Алматыда өткен шағын турнирде Елдос Ісметов алдымен Мағжан Шәмшідиннен, кейін Нұрқанат Серікбаевтан асып түсіп, өзінің үшінші Олимпиадасына қатысу құқығын жеңіп алды. 

60 келі салмақтағы балуандар бәсекесі елдегі жанкүйерлерді де, мамандар мен федерация басшыларын да біраз әбігерге салды. 

Елдос Ісметов өзіне Олимпиада алтынын алсам деген арманның маза бермейтінін айтқан еді. Себебі, Ісметовтің жүлде қоржынында Олимпиада алтынынан басқасының бәрі бар.

«Бүгін өте тартысты белдесулер өтті. Мұның жауапкершілігі өте жоғары. Бір-бірімізді 100 пайызға білеміз. Сондықтан, кездесулер ұзаққа созылды. Қателік іздеп, жүріп қалдық. Күнделікті спарринг жасап, белдесіп жүрген адаммен күресу оңайға соқпайды. Бір бас жоғары болып, айқын басымдықпен жеңу мүмкін емес. Біздің салмақта дау-дамай қатты көтеріліп кетті. Енді бәрі тікелей эфирде, ашық түрде өтті. Қазақстанда дзюдодан үш Олимпиадада медаль алған спортшы жоқ. Олимпиаданың екі дүркін жүлдегері бар. Ендігі мақсат – Қазақстанның тарихын тағы да жаңартып, Париж ойындарында жеңіске жету. Тек қана Олимпиада алтыны үшін дайындаламыз», – деді белдесуден соң Ісметов.