Елді шулатқан «Ұйқым келмейді» әнінің орындаушысы сұхбат берді

Күні кеше желі қолданушыларының арасында қызу талқыға түскен «Ұйқым келмейді» әнінің орындаушысы Алина Шакиева «1001 түн» бағдарламасына сұхбат берді.

Әнші Мәскеуде туып-өскен.17 жыл Ресейде тұрған қандас, мектеп бітіріп, елге оралған. Қазіргі таңда ол қазақ тілін үйрену үшін арнайы мамандардың көмегіне жүгініп жүр.

«Әнімнің хит болғаны мен үшін күтпеген жағдай болды. «Ұйқым келмейді» әнін жақсы тыңдап жатыр. Әрине, мен қуаныштымын. Музыкасында, сөздерінде адамды тартатын нәрсе бар деп ойлаймын» дейді Алина.

Әнші әнінің аса танымал болып жатқанына риза екенін айтты.

«Қош бол деп айттың, тағы бірдеңе дедің» деген жерін  TikTok-та бәрі қайталап жатыр. Мен бұлай таралып кетеді деп күткен жоқпын» дейді Шакиева.

Қандасымыз бала кезінен әнші болуды армандаған. Алғашқы әні 5 жыл бұрын тыңдармандарға жол тартқан. Алайда, әншінің екінші әні ел арасында кеңінен таралып кеткен.

Айта кетсек, «хит» әннің сөзін Рамазан Амантай, әуенін Диана Исмаил жазған.

Еске салсақ, жақында тыңдарманға жол тартқан «Ұйқым келмейді» әні екі күнде 300 мың рет қаралып, желі қолданушыларының арасында қызу талқыға түскен.