Елдің бұрынғы президенті Михаил Саакашвили Грузияда ұсталды

Грузияның  бұрынғы президенті Михаил Саакашвили елге келгенде қамауға алынды.  Бұл туралы Грузияның премьер-министрі Ираклий Гарибашвили хабарлады.

— Біздің құзырлы орган өкілдерінде оның Украинадан бастап Грузияға дейінгі сапары жайында алдын-ала мәлімет болды, - дейді Ираклий Гарибашвили.

Саакашвилидің елдің нақты қай аумағында қолға түскені айтылмады. Премьер тек құзырлы орган өкілдері экс-президентті тұтқындау операциясын жоғары деңгейде жүргізгенін айтты.

Бұған дейін Саакашвилидің өзі  видеоүндеу жасап, Батумиде екенін айтқан болатын. Алайда Грузияның Ішкі істер министрлігі бұрынғы президенттің шекараны кесіп өтпегенін айтып, бұл ақпаратты жоққа шығарды.

Михаил Саакашвили 2004-2013 жылдар аралығында Грузия президенті болған. Кейін елден қашып кеткенде оның үстінен бірнеше қылмыстық іс қозғалып, сырттай сот үкімі шыққан болатын.

Саясаткер Украиндағы билік алмасу процесін белсенді түрде қолдап, 2015 жылы сол елдің азаматтығын алып, Одесса облысының басшысы, кейін сол кездегі ел президенті Петр Порошенконың кеңесшісі болған.