Елдегі уақытты қайтару туралы петиция қабылданбады

Қазақстан билігі елдегі уақытты қайтару туралы өтінішті алдын ала қабылдамады. Мұндай шешім қоғамдық тыңдаулар кезінде белгілі болды.

Билік Бірыңғай уақыт белдеуінің қазақстандықтардың денсаулығы мен ұйқысына теріс әсері жоқ деп мәлімдейді.

"Өтініш берушілердің бұл денсаулыққа немесе энергияны тұтынуға әсер еткені туралы дәлелдері расталмады. Сондықтан мен алдын-ала өтінішті қанағаттандырудан бас тарту шешімін қабылдадым", - деді сауда вице-министрі Қайрат Балықбаев.

Біздің отандастарымыздың көпшілігі елдегі Бірыңғай уақыт белдеуіне қарсы. Әлемде аумағы бойынша 9-шы орында тұрған Қазақстан бірнеше уақыт белдеуінде тұруы тиіс, деп есептейді қазақстандықтар.

Қазақстанда петициялар үшін арнайы сайт пайда болғаннан бері, 50 мың қол жинай алған төрт петицияны мемлекеттік органдар қарады.

Біреуі толығымен қанағаттандырылды (шенеуніктерге құмар ойындарға тыйым салу туралы), біреуі ішінара ("ЛГБТ насихаттауға тыйым салу" туралы), екеуінен мүлдем бас тартылды (утильсбор төлемдерін жою және бұрынғы уақытты қайтару туралы).

Көктем мен жазда жарияланған басқа бірде-бір петиция 50 мың қол қоюшы талабына жақындаған жоқ.