Елде мемориалдық тақта орнату қиындай түседі

Қазақстанда мемориалдық тақта орнатуға талаптар күшейеді, деп хабарлайды Orda.kz.

Бұл туралы Мәдениет және ақпарат министрлігі мәлімдеді. Министрлік Қазақстанда өмірден өткен белгілі тұлғаларға не тарихи оқиғаларға мемориалдық тақта орнату тәртібін жүйелеу мақсатында жаңа талаптар енгізуді жоспарлап отыр. 

Жаңа ережеге сәйкес, енді ғимараттарға мемориалдық тақта орнату үшін көрнекті тұлға онда кемі 10 жыл тұрғаны не жұмыс істегені расталуы керек. Ал көрнекті тұлғаларға мемориалдық тақта орнату үшін ол өмірден өткеннен кейін кем дегенде 5 жыл уақыт өтуі тиіс. Дегенмен, министрлік бұл жаңа ереже мемлекет тәуелсіздігін күшейтуге аса маңызды үлес қосқан, қаһармандық пен ерлік көрсеткен тұлғаларға және тарихи маңызы бар оқиғаларға қатысты қолданылмайтынын айтты.