Елбасы сайты казиноны жарнамалауда

Тұңғыш президенттің ресми сайты домендік атауын nazarbayev.kz-ке ауыстырғаннан кейін, оның ескі домені қорғалмаған күйде қалып, оны алаяқтар иемденді, деп хабарлайды Orda.kz Zajmy.kz сайтына сілтеме жасап.

Енді онда Нұрсұлтан Назарбаевтың әдеттегі фотосуреттері мен өмірбаянының орнына, онлайн-казиноны дұрыс таңдау туралы ақпарат пен «ең үздік қазақ казиносының рейтингі» ұсынылып тұр.

Тағы бір қызығы, сайттың байланыс бөлімінде бұрынғы президенттің атағы әлі де сақталған, e-mail ретінде [email protected] көрсетілген.

Мекенжайды адрес жолына енгізгенде сайт ашылмай, 503 қателігін береді. Алайда Google іздеу жүйесі арқылы өткенде сайт еш қиындықсыз ашылады. Оның үстіне, сайтта порталдың қауіпсіз әрі сенімді екендігіне сендіреді. Orda.kz бұл сайттың сол күйінде тұрғанына көзі жетті. Сайтта әлі де онлайн-казино туралы ақпарат пен «ең үздік қазақ казиносының рейтингі» көрсетілуде.

Еске сала кетсек, осы жылдан бастап заң бойынша онлайн-казино жарнамасына тыйым салынған. Оны бұзғаны үшін 200 мың теңгеден бастап айыппұл салынады.