Араласпаймын, кедергі болмаймын – Назарбаев билік туралы

Нұрсұлтан Назарбаев американдық режиссер Оливер Стоунға берген сұхбатында президенттік қызметінен қалай кеткені туралы айтты.

Бұл туралы Orda.kz хабарлайды.

– Ли Куан Ю (Сингапур) өте қатал көшбасшы болды. Ол қызметінен кеткеніне қарамастан, әлі де билікке араласады. Сіз туралы осындай әңгіме айтылады. Шын мәнінде сізді қазірдің өзінде ұлттық қауіпсіздік, қорғаныс және экономиканы басқарады деп айтады, - деді Оливер Стоун Елбасыға.

Нұрсұлтан Назарбаев әр елдің өз жүйесі болу керектігін және ең бастысы халықтың пікірі екенін жеткізді.

– Неліктен олар тек бұл туралы айтады? Неліктен бұл халыққа жақсы немесе жаман екенін айтпайды? Егер бұл тұрақтылыққа, дамуға және беделге ықпал етсе. Неге болмасқа?

Неліктен әр ел өз жүйесін таңдай алмайды? Менің ойымша, ең бастысы – халқымның айтқаны. Мен танымалдылығымның шыңында қызметімнен кеттім. 2015 жылы болған сайлауда 95 пайыз дауыс жинадым. Бірақ әңгіме мені мәңгі президент етіп қалдыру туралы болды. Мен бұған, әрине, келіспедім, - деді Нұрсұлтан Әбішұлы.

Нұрсұлтан Әбішұлы президенттік қызметінен мүлде кеткісі келгенін айтты. Бірақ Қазақстанның тұңғыш президентіне өмір бойына қалуды ұсынған.

– Мен мүлдем кеткім келді. Олар маған: мәңгілікке қал деді. Мен қалмайтынымды айттым. Сайлау өткізейік, мен Қауіпсіздік Кеңесінде, саяси партияда болып, сол арқылы елдің дамуына үлес қосуға дайынмын дедім.  Біз мұнымен келістік. Конституциялық заң қабылданды. Біздің парламент, біздің конституциямыз, біздің заңдарымыз. Осы заңдар бойынша мен өз мәртебемді жүзеге асырамын, - деді Назарбаев.

Сондай-ақ, Назарбаев елді жаңа басшы басқаратынын, оның қызметіне араласып, кедергі келтірмейтінін айтты.

– Елді жаңа Президент басқарып отыр. Араласпаймын. Кедергі болмаймын. Керісінше, кеңесші ретінде көмектесемін. Билік Президентте. Оның құзыреті Конституцияда жазылған, - деді Қазақстанның тұңғыш президенті.

Еске салайық, 2019 жылдың 19 наурызында Нұрсұлтан Назарбаев президенттік өкілеттігін тоқтатқан мәлімдеген еді. Елбасы бұл шешіміне өкінбейтінін айтқан.