«Ел үшін күрескер» Ермахан Ибраимовқа қарсы арыз жазылады

Бокстан Олимпиада чемпионы Ермахан Ибраимовты сот ісі күтіп тұр. 10 қаңтардағы митингідегі оқиғадан кейін оған қарсы полицияға арыз түсірілмек.

Бұл туралы Демократиялық партия құру жөніндегі бастамашыл топтың белсендісі Әйгерім Тілеужан Facebook-те хабарлады.

«Ертең, 25 қаңтарда сағат 10.00-де адвокатым Ерлан Қалиев екеуміз Алматы полиция бөліміне Ермахан Ибраимовтың үстінен арыз жазуға барамыз», - деп жазды ол.

10 қаңтарда өткен Мәжіліс сайлауында, Алматыда қауіпсіздік күштері наразылық білдірушілерді шамамен жеті сағат қоршауда ұстады.

Қазақстандық олимпиада чемпионы Ермахан Ибраимовқа ұқсас адам Алматыдағы наразылық білдірушілердің қоршауын бұзып өтпек болды. Боксшы кейінірек өз ұстанымын «Мен елім үшін күрестім» деген сөздермен түсіндірді.

Белсенділер «Ермахан, кет!» деп айқайлап, спортшыны қуып жіберді. Содан кейін боксшы оқиға орнынан кетіп қалды.