Ел медицинасы сынға қалды: Қазақстандықтардың неге көңілі толмайды?

Қазақстанда медициналық қызмет сапасына көңілі толмайтындардың саны күрт өсті. Соңғы бес жылда Денсаулық сақтау министрлігіне түскен шағымдар саны 60,8%-ға артып, 7,7 мыңға жетті, деп хабарлайды Orda.kz.

Қоғамдық саясат институтының деректеріне сүйенсек, әрбір төртінші қазақстандық медициналық мекемелерге наразылық білдіреді, шағымдардың басым бөлігі қала тұрғындарынан түседі (29,1%).

Негізгі шағымдар келесі себептерге байланысты:
- Сапасыз медициналық көмек – 32,5%;
- Ұзақ күту және ұзын кезектер – 22,2%;
- Емдеуден негізсіз бас тарту – 16,3%;
- Медициналық қызметкерлердің дөрекілігі – 15,2%;
- Диагнозды дұрыс қоймау – 12,5%.

Зерттеулер көрсеткендей, орта жастағы және табысы төмен адамдар медициналық қызметтерге жиі шағымданады. Сонымен қатар, әйелдер, ауыл тұрғындары және көп балалы отбасылардың шағымдары көбірек.

Қазақстандағы медициналық қызмет сапасына наразылық халықаралық деңгейге де жетті. STADA Health Report 2024 зерттеуі бойынша, қазақстандықтардың 67%-ы денсаулық сақтау жүйесіне қанағаттанбайтынын білдірген, еліміз зерттеуге енген 23 мемлекеттің ішінде екінші орында.

Өсіп келе жатқан наразылық аясында, Қазақстан Президенті Қасым-Жомарт Тоқаев бірыңғай мемлекеттік медициналық көмек пакетін және интеграцияланған медициналық ақпараттық жүйе құруды тапсырды. Денсаулық сақтау министрлігі бұл тапсырмаларды орындауға кірісіп, бірнеше ірі бағдарламаны біріктіру арқылы дәрігерлердің құжаттармен жұмыс істеуге жұмсайтын уақытын қысқартып,  қызмет көрсету сапасын жақсартуды көздеп отыр.