Екпенің «жасыл» және «көк» статусы туралы қаулыға қол қойылды

Елімізде коронавирустық инфекцияға қарсы екпенің «жасыл» және «көк» мәртебесі бекітілді.

Қазақстанның бас санитарлық дәрігері міндетін атқарушы Айжан Есмағамбетова қайта егу туралы жаңа қаулыға қол қойды.

Құжат ҚР Денсаулық сақтау министрлігі комитетінің ресми сайтында жарияланды.

Құжатта COVID-19-ға қарсы вакциналау курсы аяқталмаған адамдар үшін «жасыл» статус вакцинаның бірінші компонентін алғаннан кейін 21 күн бойы сақталады деп көрсетілген.

21 күнтізбелік күннен кейін екпенің екінші курсы болмаған жағдайда «жасыл» мәртебесі «көк» түске ауыстырылады.

COVID-19-ға қарсы вакциналау курсын аяқтаған адамдар үшін «жасыл» мәртебесі бір жыл бойы сақталады.

COVID-19-ға қарсы қайта егуден өткен адамдар үшін «жасыл» мәртебесі қайта вакциналау жасалған күннен бастап бір жыл бойы сақталады.

Қазақстандықтар мен елде үш айдан астам уақыт тұратын шетелдіктер COVID-19-ға қарсы ревакцинация курсынан өте алады.

Бастапқы курсты аяқтағаннан кейін немесе коронавирустан айыққаннан кейін алты ай аралықпен қайта вакциналауға болады. Кез келген вакцинамен қайта вакциналауға рұқсат етіледі.

Құжат күшіне енді.