Екпеден кейін дәрігер көз жұмған, бірақ оның екпеге қатысы жоқ

ҚР Денсаулық сақтау министрлігі Алматы облысында медициналық қызметкердің қайтыс болғанын растады. Бірақ бұл оқиғаны коронавирусқа қарсы екпемен байланыстыру ерте.

Бұл туралы Orda.kz Азаттыққа сілтеме жасап хабарлады.

7 сәуірде өткен брифингте вице-министр Ажар Гиният Қазақстанда Sputnik V вакцинасынан ресми түрде өлім болмағанын айтты.

– Егер Алматы облысындағы әріптесімнің қайтыс болуы туралы айтатын болсақ, біз бұл ақпаратты тексердік. Денсаулық сақтау министрлігі атынан марқұмның отбасы мен жақындарына көңіл айтамын. Екіншіден, мен оның екпеден екі күн өткенде қайтыс болғанын атап өткім келеді. Ол үйде құлап, көз жұмған. Сот-медициналық сараптама жүргізіліп жатыр. Алдын ала мәліметтер бойынша, өлімнің себебі жүректің ишемиялық ауруы болған, - деді Гиният.

Әлеуметтік желілерде және WhatsApp мессенджерінде вакцина алғаннан кейін дәрігердің қайтыс болғаны туралы дауыстық хабарлама түсірілген видео таратылуда. Дауыс авторы сонымен қатар әйелдің «№4 перзентханада жұмыс істегенін», «вакцинаны кеше алғанын, бүгін таңертең қайтыс болғанын» айтады.

Вице-министр өлім жағдайын арнайы құрылған комиссия тексереді дейді, сондықтан қазір «бұл коронавирустық инфекцияға қарсы екпеден болған өлім деп айтуға болмайды».

Қайтыс болған адамның аты-жөні мен жасы, оқиғаның қайда орын алғаны айтылмады.