Екпе төлқұжатын заңсыз жасағандар ұсталды

Қаржылық мониторинг кезінде Қазақстанның бес өңірінде  жалған вакцина паспортын жасағандар ұсталды.

Бұл туралы Orda.kz хабарлайды.

Медицина қызметкерлері жалған вакцина паспорттарын 5000 теңгеден бастап 30 000 теңгеге дейін сатқан. Аталған фактілер бойынша қылмыстық кодекстің 385-бабында көрсетілген  құқық бұзушылық белгілеріне сәйкес тергеу басталды.

«Қаржылық мониторинг агенттігінің аумақтық бөлімшелері жедел-іздестіру шараларын жүргізу барысында Алматы, Шымкент, Ақтөбе, Павлодар және Тараз қалаларында коронавирустық инфекцияға қарсы вакцинациялаудың жалған паспорттарын заңсыз сатқан медицина қызметкерлері мен басқа да тұлғаларды анықтады», - деді ҚМА баспасөз қызметі.

Жалған вакцина паспорттары берілген 37 азамат, сондай-ақ жалған құжат жасауға қатысы бар 12 адам, оның ішінде 8 медицина қызметкері анықталды. Басқа күдіктілерді  анықтау үшін жедел-тергеу шаралары жалғасуда.

Қаржылық мониторинг агенттігі азаматтарға жалған вакцина паспорттарын пайдаланғаны үшін 467 мың теңге  мөлшерінде айыппұл салынатынын немесе 40 тәулікке дейін қамауға алынатынын еске салады.

Аружан Төлебай