Екпе мен донорлықтан бас тарту: ҚР ДСМ басшысы Бас мүфтимен кездесті

Денсаулық сақтау министрі Ақмарал Әлназарова Қазақстан мұсылмандары діни басқармасының басшысы, Бас мүфти Наурызбай Тағанұлымен екпе және донорлық органдар мәселесін талқылады, деп хабарлайды Orda.kz.

Әңгіме барысында Денсаулық сақтау министрі соңғы жылдары Қазақстанда да, бүкіл әлемде де екпеден бас тарту үрдісі артып келе жатқанын, сондықтан екпе алмаған азаматтар арасында жұқпалы аурулардың өршуі жиілеп кеткенін баса айтты.

«Профилактикалық екпелерден бас тарту балалардың денсаулығына қауіп төндіреді, оларды жұқпалы аурулардан және одан туындайтын ықтимал зардаптардан қорғауды шектейді», - деп атап өтті Ақмарал Әлназарова. 

Министр сондай-ақ екпеден бас тартудың басты себептерінің бірі ата-аналардың діни наным-сенімдерінің әсері екенін баса айтты.

«Діни басқарма өкілдеріне арнаған сөзінде министр жергілікті қауымдастық арасында, жамағат ортасында және мешіттерде қайтыс болғаннан кейінгі донорлық мәселелерін түсіндірудегі діни жетекшілердің рөлі жайында айтты. Бұл адамдарға саналы және жауапты шешім қабылдауға көмектесетінін еске салды», - деп хабарлады Денсаулық сақтау министрлігі. 

Осы орайда ҚР Денсаулық сақтау министрлігі Қазақстан мұсылмандары діни басқармасымен ынтымақтастықты нығайтуды жоспарлап отыр.

Бүгінде Қазақстанда 4117 адам ағзаларын трансплантациялау кезегінде тұр, оның 96-сы балалар.

Еске салсақ, діни басқарма 15 қаңтарда дің жасушалары донорлығына рұқсат беретін пәтуа жариялады.