Екпе алуға келген ер адам дәрігерді тұншықтырып, ұрған

Алматы облысының Ескелді ауданында  ер адам екпе салмақшы болған дәрігерді ұрып тастады. 

Оқиға 21 мамырда Ескелді аудандық ауруханасында болған, деп хабарлайды Orda.kz.

Облыстық денсаулық сақтау басқармасының баспасөз қызметі ер адамның вакцина алуға келгенін растайды. Дәрігер түсіндіру жұмыстарын жүргізе бастаған уақытта науқас ашулы күйде, өз-өзін ұстай алмай, дәрігерге дөрекі сөйлеген.

Медицина қызметкерінің ескертуіне науқас балағат сөздер айтып, дәрігерге қол жұмсай бастады. Ол дәрігерді ұрып, тұншықтырып, беті мен мойнына бірнеше соққы берген.

Оқиға орнына полиция шақырылып, дәрігер амбулаториялық емдеуге жіберілді. Себебі, екпе салмақшы болған дәрігердің миы шайқалып, денесі көгерген. 

— Бұл факт полицияда тіркелді. Қарабұлақ ауылының 31 жастағы тұрғынына қатысты «Денсаулыққа қасақана жеңіл зиян келтіру» бабы бойынша әкімшілік іс қозғалды. Сот-медициналық сараптаманың қорытындысын алғаннан кейін материал процессуалдық шешім қабылдау үшін сотқа жіберіледі, - деп жауап берді Алматы облысы ПД баспасөз қызметі.