Екпе алғандар жаппай ауруханаға түсіп жатқаны рас па?

Жақында желіде «вакцина салдырғандар ауруханаға түсіп жатыр» деген ақпарат пайда болды. Оған қатысты ҚР Денсаулық сақтау министрлігі мәлімдеме жасады.

Бұл туралы Orda.kz stopfake басылымына сілтеме жасап хабарлады.

ҚР Денсаулық сақтау министрлігі «вакцина салдырғандар ауруханаға түсіп жатыр» деген ақпаратты жоққа шығарды.

– Міне, екпе деп осыны айт. Менің кіндік апам ковидтік госпитальде жұмыc істейді. Қазіргі кезде ауыр, орташа ауыр жағдайда және өлім аузында жатқандар – 100 процент вакцина салдырғандар. Медицина мамандары науқастардан екпе салдырғанын, я салдырмағанын сұрай бастады, - делінген Telegram каналдардың бірінде.

Министрлік ақпаратты жоққа шығарды, бірақ екпе алғандар да COVID-19-бен ауырып жатқандарын растады.

– Олардың саны өте аз. Осы уақытқа дейін Қазақстанда вакцина алған 3 246 795 адамның 0,05%-ы COVID-19-мен ауырған. Сосын індетті жұқтыру жағдайларының басым бөлігі препараттың тек бір ғана дозасын алып үлгергендер арасында тіркелген. Себебі КВИ-ге қарсы иммунитет әлі толық қалыптаспаған.