Екінші дүниежүзілік соғыстағы жеңістің 80 жылдығына орай 42 мың адам мерейтойлық медаль алады

Қорғаныс министрлігі екінші дүниежүзілік соғыстағы жеңістің 80 жылдығына орай қазақстандықтарды марапаттау жоспарымен бөлісті, деп хабарлайды Orda.kz.

«Қорғаныс министрлігі әскери-патриоттық іс-шараларды жоспарлап, өткізіп, ерекше көзге түскен әскери қызметкерлерге құрмет көрсетіп, соғыста қаза тапқан қазақстандық жауынгерлерді мәңгі есте қалдыру және олардың ерліктерін бұқаралық ақпарат құралдарында жариялау бойынша жұмыс жүргізіп жатыр. Министрлік ардагерлерді мерейтойлар және мемлекеттік мерекелермен тұрақты түрде құттықтайды», деп мәлімдеді Қорғаныс министрлігі журналистер сауалына берген жауабында.

Сондай-ақ көптеген ел азаматтары мерейтойлық медальдармен марапатталады.

«Жеңістің 80 жылдығына арналған мерекелік медальді 42 мың адамға табыстау жоспарланды. Ол бірінші кезекте екінші дүниежүзілік соғысының ардагерлері мен тыл еңбеккерлеріне арналған. Қалған шаралар туралы ақпарат 7 және 9 мамырда министрліктің сайтында жарияланады» деп жазылған хабарламада.

Екінші дүниежүзілік соғыстағы жеңістің 80 жылдығына орай Астанада шеру өтетінін бұған дейін жазған болатынбыз.

Парадқа дайындыққа байланысты Қорғаныс министрлігі Астананың үстінен өтетін ұшуларға уақытша шектеу қояды.

Жеңістің 80 жылдығына орай Астанада әскери парад өтеді.  Парадқа 2,5 миллиард теңге жұмсау жоспарланған.

Дегенмен мұндай шығындар мен іс-шаралардың қажеттілігін ұлттық экономика вице-министрі Арман Қасенов түсіндіріп, 2,5 миллиард теңге жеңіс шеруі үшін көп қаражат емес, деген болатын.