Екібастұз ЖЭО басшысының өлі денесі табылды

Екібастұзда жылу электр орталығының учаске бастығы Сергей Видлогтың мәйіті көлік ішінен табылды.

Бұл туралы журналист Асхат Ниязов хабарлады.

Ақпаратты облыстық полиция департаменті растады.
Өлімнің алдын ала себебі: көміртегі тотығынан улану.

«4 желтоқсан күні сағат 21.25-те «За Рулем» гараж қоғамында ВАЗ-21099 автокөлігі ішінен 20.08.1989 жылы дүниеге келген «ЖЭО» ЖШС учаскесінің бастығы С.В.Видлогтың мәйіті табылды» делінген рапортта.

Құжатқа сәйкес, мәйіт зорлық-зомбылықпен өлім белгілерінсіз.

Аталған факті бойынша ҚР Қылмыстық кодексінің 105-бабының 1-бөлігі (өзін-өзі өлтіруге итермелеу) бойынша қылмыстық іс қозғалғаны көрсетілген.

«Бұл деректі Екібастұз қаласының полиция басқармасы тіркеді. Тергеу жүріп жатыр» делінген полиция хабарламасында.

Еске салсақ, Екібастұзда жағдай әлі де шешілу деңгейінде, ал жергілікті тұрғындардың жағдайы ауыр, оңалып кете қойған жоқ. Көбінде әлі де жылу мен ауыз су жоқ.

Еске салайық, 27 қарашаға қараған түні Екібастұз жылу электр орталығындағы бірнеше қазандық қондырғысының тоқтап қалуына байланысты қала тұрғындары жылусыз қалған болатын. Кейін қалада төтенше жағдай жарияланды.

Павлодар облысының прокуратурасы ҚР қылмыстық кодексінің 254-бабы бойынша қылмыстық іс қозғады.